1Cor 16 | YML | STEP | Tutuya de'e, nuanuaku a na veifufu yami 'anivelena-maimaiga faifaina, maninina 'wainega Yaubada yana tomotoga i vewekowekomaga 'wa na 'ivaisedi. Tovetumagana 'aila'a tulina tulina 'awalawa Galetia nageneye yaku nuanua 'anivelena-maimaiga faifaina a vonedi i na 'idewai, 'omi wata bani'odi 'wa na 'idewai.

1 Corinthians 16

'Anivelena-maimaiga tovetumagana 'adi 'aivaita faifaina.

1 Tutuya de'e, nuanuaku a na veifufu yami 'anivelena-maimaiga faifaina, maninina 'wainega Yaubada yana tomotoga i vewekowekomaga 'wa na 'ivaisedi. Tovetumagana 'aila'a tulina tulina 'awalawa Galetia nageneye yaku nuanua 'anivelena-maimaiga faifaina a vonedi i na 'idewai, 'omi wata bani'odi 'wa na 'idewai. 2 'Aiata Tafalolo 'aitamogana 'aitamogana yami mani 'ifwaidi 'wa na yatoyato 'anivelena-maimaiga faifaina. 'Wa na yatoyatoga, 'aitamogana 'aitamogana yana folova 'ana tutula 'ana 'etowava 'wainega, 'ai'edi tutula bwaikina, wata bwaikina i na yato, we'e 'ai'edi siaina, wata i na yato siaina. 'Wa na yayato-vagata bega tutuyanina a na waiga nonogina i na 'eno'eno. 3 Tomotoga 'ifwaidi 'wa na venua'ivinedi maninina i na naweni faifaina, mulieta a na wai tomotoganidi yadi lubulubu a na kilumidi 'adi 'aseta wata 'adi awave'atumai faifaidi. I na 'a'avana a na vetunedi yami 'anivelena-maimaiga i na naweni Ielusalema i na 'aniveleneni tovetumagana i vewekowekomaga 'waidie. 4 'Ai'edi i na lubwaineni yau a na nunago Ielusalema, tomotoganidi a na vonedi taiadi 'a na nagoi.

S1 2 Kol 8:1-7

Faulo i na nago Kolinita, faifaina i veifufu.

5 Tutuyanina a na viwaiga, nagami 'awalawa Masidonia matatabuna 'waineye a na lauvivila, mulieta a na viwaina a na le'wa. 6 A na waiga voke sai'afo taiadi ta na yogomia, 'alo voke kaukau 'ana tutuya matatabuna bei taiadi ta na miamia, mulieta yami 'aivaita 'wainega a na tauya a na nago tamu 'atamana 'waineye. 7 Kebu nuanuaku 'isa'ava faifaina a na wai, begaidi nagami a na nago Masidonia, tutuyanina yaku folova i na 'a'ava a na wai 'waimie. 'Ai'edi 'Auvea i na tauyekuga, nuanuaku tutuya manamanawena taiadi ta na yogomia.

8 Siwe tutuya de'e a na miamia 'atamana Efeso, sakali bwaikina Fenitikosi 'ana 'aiata i na veluagai, mulieta a na wai. 9 A na miamiaga fai 'Anu'anunu 'Atumaina yana 'aivaita 'wainega me Efeso fuedi i nunuaviladi i vevetumagana Keliso 'waineye, wata Keliso 'ana tovedumwe'ai'ai fuedi yaku folova i 'i'ivesakoi begaidi a na miamia.

S5 Lom 15:23-24S9 Fol 19:1-2,8-10

Faulo yana vona 'ana 'eba ve'a'ava.

10 'Ai'edi Timoti i na viwai i na le'wa 'waimie, kebu nuanuaku i na kololoyemi, ma yami sosoana 'wa na veianeni fai taunina i folofolova 'Auvea faifaina yau a folofolovaga bani'odi. 11 Fai taunina 'Auvea yana tofolova, bega kebu tamu aitoi 'waimiega i na kibuya, taiadi 'wa na miamia mulieta yami 'aivaita 'wainega wata ma yana sosoana i na vilai i na mai 'waikuye. Edavo tovetumagana wata Timoti taiadi, faifaidi a lulukamata.

12 We'e iada Afolosa a toke a vonevoneni nuanuaku i da wai i da fogemi edavo tovetumagana 'ifwaidi taiadi siwe i baila, kebu nuanuana tutuya de'e i na wai. Siwe tamu tutuya safailina 'waineye i na wai.

13 'Wa na 'isa'isa, taunimi yami sauluva 'wa na 'i'isave'avinidi, ma yami vetumagana 'wa na tovotovoi fa'alina, nuafoumi i na fa'alidi bega kebu 'wa na kololo Keliso 'ana tovedumwe'ai'ai 'waidie, wata 'wa na vevetoketoke. 14 Ava'ai 'wa na 'i'idewadiga, yami sauluva matatabuna nuakalikali.

15 'Akonadi 'wa 'asetai 'awalawa Gulisi matatabuna nageneye Sitefana ma yana 'aila'a taunidi nagami i vetumagana Keliso 'waineye, mulieta tomotoga 'ifwaidi. Ma yadi dumwebika taunidi i tauyedi Yaubada yana tomotoga 'ada 'aivaita faifaina. Ekwavo, nuanuaku bwaikina ma yami ve'ililibu taunimi 'wa na tauyemi tomotoganidi 'waidie wata 'ifwaidi tomotoga 'waidie, kumanidiavo yadi sauluva bani'odi Sitefana ma yana 'aila'a. Wata nuanuaku taunimi 'wa na tauyemi tomotoganidi i toke i folova-vaita Keliso faifaina 'waidie.

17 Fai 'omi kebu taiadi ta da miamia a nunuavita, siwe edavo 'ifwaidi i maia 'waimiega i kiavesosoaniku, tomotoganidi Sitefana, Fotiuneto, wata Akaikasi. 18 Tomotoganidi i le'wai nika i kiavesosoaniku wata i kiavetoketokeku, 'omi wata bani'odi 'akonadi 'aivaitanidi 'wa veluagadi 'waidiega. Tomotoganidi de'e bani'odi i lubwainemi 'aila'a matadie 'wa na awa'ai'aidi.

S10 1 Kol 4:17S11 1 Tim 4:12S12 1 Kol 3:6

Faulo yana 'alanuai.

19 Keliso yana 'Aila'a tulina tulina 'awalawa Eisia nageneye yadi vekaiwa i vetunedi 'waimie. Wata Akwila ma yana vavine Filisila wata tovetumagananidi i vava'auta yadi vanuge, ma fuedie ma yadi nuakalikali yadi vekaiwa i vetunei 'waimie 'Auvea 'ana wagavayega. 20 Emiavo tovetumagana taiadi 'a miamianiga, wata yadi vekaiwa i vetunei 'waimie.

Emiavo tovetumaganavo 'wa na veluagadiga, ma yami nuakalikali 'wa na 'avalamaigidi.

21 Side bei yaku leta 'ana tokiluma a voneni i 'ailove, yau tauniku a na ve'a'avai. Yau Faulo de'e nimaku, a vekaiwa 'waimie.

22 'Ai'edi aitoi 'ada Toveimea Keliso kebu i na nuakalikalieniga, Yaubada ma yana nuasako vematavuloga i na veleni i na wafaotoga.

Iesu, 'omu 'ama Toveimea, nuanuama 'u na mai-matayo'o.

23 A vevelu'ui faifaimi, nuanuaku 'ada Toveimea Iesu ma yana nuakalikali i na vevesauluva 'atumaina 'waimie.

24 'Ida matatabuda Keliso yana tomotoga, begaidi a nuakalikaliemi bwaikina.

S13 Efe 6:10S15 1 Kol 1:16S16 1 Tes 5:12
S18 Fmi 1:7S19 Lom 16:3-5S22 Ve 22:20

'Asa'aiana bani'odi,

Yau Faulo.